Hafa tvær vikur til að deyja

Varanasi er heilög borg. Hindúar trúa því að það að deyja í Varanasi og láta dreifa ösku sinni yfir gruggugt vatn Ganges árinnar bjargi þeim úr hringrás dauða og endurfæðinga.

Á hverju ári flykkjast þúsundir manna til borgarinnar til að deyja. En það hafa ekki allir efni á því að gista á fínu hóteli síðustu dagana. Og hótelhaldarar eru tregir til að hleypa að fátæku fólki sem ætlar sér að deyja frá reikningnum.

Á mottum á berum steypugólfum Mukti Bhawan gistiheimilisins liggur fólk og bíður dauðans. Sumir eru meðvitundarlausir, aðrir í andaslitrunum. Um 30 til 70 manns deyja þar í hverjum mánuði.

,,Aðrar þjóðir fagna nýju lífi þegar börn fæðast, við fögnum dauðanum á sama hátt" segir Bhairav Nath Shukla, framkvæmdastjóri gistiheimilisins.

Fátækasta fólkið borgar ekkert fyrir gistinuna síðustu dagana á Mukti Bhawan. En að spá fyrir um dauða fólks eru ekki nákvæm vísindi, og oft erfitt að segja til um hve margir síðustu dagarnir verða. Margir hafa ferðast um langan veg með miklum tilkostnaði, og lenda í vandræðum deyji þeir ekki nógu fljótt.

Ef að fólk er ekki látið innan tveggja vikna frá því það skráir sig inn er það yfirleitt beðið um að skrá sig út og rýma fyrir öðrum. Á álagstímum hefur Shukla þó leyft fólki að deyja á skrifstofunni sinni. Ef lítið er að gera, fellur hann stundum frá tveggja vikna reglunni.

Shukla segir að það sé engin sorg á Mukti Bhawan.

,,Við verðum vitni að dauðanum, grátinum, óreiðunni á hverjum degi, hvað er að óttast? Það verður annað líf eftir þetta, svo það er ekkert að óttast. Það er kjánalegt að gráta yfir þessu."