Bætist í barnaskarann hjá Brangelinu

Venjulegir ferðamenn láta sér yfirleitt nægja póstkort og lyklakyppur sem minjagripi. Ekki Angelina Jolie og Brad Pitt.

Stjörnuparið ferðast mikið og á heilan sæg af börnum sem þau hafa sótt hér og þar um heiminn. Þau eiga nú hinn Fimm ára gamla Maddox frá Kambódíu, Pax Thien, þriggja ára frá Víetnam, Zahöru, tveggja ára, frá Eþíópíu, og Shiloh, líffræðilega eins árs dóttur þeirra.

Nú hyggjast þau bæta fimmta barninu við.

Jolie er við tökur á nýjustu mynd sinni, ,,Wanted" í Prag. Samkvæmt heimildum götublaðsins The Sun hefur hún vanið komur sínar á kaþólskt munaðarleysingjahæli í miðborginni, og fallið fyrir einu barnanna, litlum dreng.

,,Angelina hélt upp á 32ja ára afmælið sitt í gær og sagði Brad að henni fyndist kominn tími til að bæta við fjölskylduna." ,,Hún hringdi í Brad og sagði honum að hún hefði fundið barn sem passaði fullkomlega við hin börnin" sagði heimildamaðurinn.

Pitt, sem er í Montreal að undirbúa sig undir einkaflugmannspróf, flaug til Tékklands um helgina að hitta drenginn.