Paris Hilton er hætt að borða

Paris Hilton, sem þykir nokkuð spengileg fyrir, er nú hætt að borða vegna álagsins sem fylgir því að vera á leið í fangelsi.

Hilton hefur afplánun á 23 daga fangelsisvist á þriðjudaginn. Hún var upphaflega dæmd til 45 daga fangelsisvistar fyrir að brjóta skilorð þegar hún keyrði drukkin, en dómurinn var mildaður.

Fjölskylda hennar og vinir segjast hafa miklar áhyggjur af stúlkunni sem borði ekki neitt, gráti í sífellu og sé við það að brotna undan álaginu.

Hótelerfinginn ætti nú að vita um það bil að hverju hún gengur, en Lynwood fangelsið sem hún mun afplána í hefur sent frá sér mynd af dæmigerðum klefa í fangelsinu.

Gárungarinir hafa uppnefnt fangelsið Lynwood Hilton, en það á sennilega ekki mikið sameiginlegt með hótelinu. Í það minnsta eru vínilklæddar dýnur, kojur og stálklósett ekki staðalbúnaður í herbergjum keðjunnar.