Afar óheppilegt að listinn barst til Impregilo

Heilbrigðisstofnun Austurlands og Impregilo hafa sent frá sér sameiginlega yfirlýsingu vegna frétta af veikindum vegna loftmengunar í aðrennslisgöngum Kárahnjúkavirkjunar. Þar segir að afar óheppilegt hafi verið að bráðabirgðalisti um sjúklinga sem mögulega urðu fyrir mengunaráhrifum í aðrennslisgöngum virkjunarinnar skuli hafa borist Impregilo. Listanum verður skilað til HSA.

Í tilkynningunni segir að þann 26. apríl hafi stjórnendur Impregilo og HSA fundað með yfirtrúnaðarmanni Kárahnjúkavirkjunar og fulltrúa Landsvirkjunar. Fjallað var um aðdraganda þess að 12. apríl vaknaði grunur um að mengun í aðgöngum væri á tilteknum stöðum í svo miklu magni að heilsu starfsmanna væri mögulega stefnt í voða.

Fram kom á fundinum að yfirlæknir HSA á Kárahnjúkum hefði komið á framfæri upplýsingum um málið til stjórnenda Impregilo, eftirlitsaðila og annarra sem í hlut áttu. Farið hafi verið fram á úrbætur og hóf Impregilo þegar aðgerðir til að auka loftræstingu í göngunum en vegna ýmissa aðstæðna tókst ekki að bæta loftskipti nægilega mikið.

„Þann 22. apríl komu á heilsugæsluna fjórir einstaklingar sem höfðu veruleg einkenni eitrunar og gerði læknirinn þá Landsvirkjun, Vinnueftirliti ríkisins og Heilbrigðiseftirliti aðvart," segir ennfremur. „Í kjölfarið var vinnu hætt í göngunum 24. apríl og verður ekki fram haldið fyrr en tekist hefur að leysa vandann." Bráðabirgðalisti með 180 nöfnum einstaklinga sem leituðu til heilsugæslunnar á tímabilinu 12.-24. apríl vegna einkenna sem hugsanlega gátu verið vegna mengunar var þá settur saman.„Innhald skjalsins komst í hámæli áður en tími gafst til að vinna nánar með listann og flokka frá þá sem ástæðulaust var að skoða frekar. Öllum sem urðu veikir eða höfðu skýr einkenni um eitrun var sinnt strax. Ekki hefur unnist tími til að gera endanlega skýrslu um þessi atvik og það mun taka þó nokkurn tíma. Sem betur fer virðast ekki allir þeir, sem á bráðabirgðalistann eru skráðir, hafa orðið fyrir eitrun eða óþægindum vegna mengunar heldur geta orsakir veikinda þeirra verið aðrar."

Stjórnendur Impregilo og HSA segjast í yfirlýsingunni vera sammála um að skynsamlegt og rétt hafi verið að flokka alla sem einkenni höfðu í áhættuhóp og að bíða verði úrvinnslu gagna til að sjá raunveruleg áhrif mengunarinnar. Það sem mestu máli skipti sé að halda áfram virkri heilsugæslu og heilbrigðisþjónustu á virkjanasvæðinu með hagsmuni starfsmanna að leiðarljósi. Þjónustunni er sinnt af hæfu og dugmiklu fólki sem vinnur oft undir miklu álagi við erfiðar aðstæður, segir einnig. „Það var afar óheppilegt og andstætt reglum að bráðabirgðalisti um þá, sem hugsanlega gætu hafa orðið fyrir mengunaráhrifum, barst í hendur stjórnenda fyrirtækisins. Ekkert liggur fyrir sem sannar ásakanir um að þeir hafi látið starfsmann sinn taka listann ófrjálsri hendi. Listanum verður skilað framkvæmdastjóra HSA."

Undir tilkynninguna rita fyrir hönd HSA og Impregilo, Einar Rafn Haraldsson, framkvæmdarstjóri HSA og Ómar R. Valdimarsson, talsmaður Impregilo.