Höggmyndasýning í húsagarði í Árbæ

Í húsagarði við Hábæ 41, rétt neðan Árbæjarkirkju, var fjöldi fólks saman kominn í dag. Húsráðendur, þau Guðrún Gunnarsdóttir myndlistarmaður og Stefán Thors skipulagsstjóri, drógu fána að húni enda stóð mikið til. Það var verið að opna myndlistarsýningu. Guðrún segist með þessu framtaki vilja auðga menninguna í Árbænum. Þau hafi þennan stóra og mikla garð sem henti vel til að sýna skúlptúra.

Fyrsti listamaðurinn til að sýna í þessu opna sýningarrými er Örn Þorsteinsson myndhöggvari. Hann sýnir þarna verk steypt úr áli, eftir steinmyndum sem hann hjó úr fjörugrjóti í Skagafirði, og má sjá úr þessu ýmsar kynjaskepnur sem allt eins gætu verið ættaðar úr hafinu. Garðurinn er við vinsælan göngustíg, rétt ofan Elliðaánna, og þarna verða verkin til sýnis næstu tvo mánuði.