Stóðu vaktina í sautján klukkustundir

Slökkviliðsmenn stóðu vaktina í sautján klukkustundir í miðbæ Reykjavíkur í gær og í nótt vegna brunans þar. Hundrað og tíu starfsmenn slökkviliðsins voru að störfum þegar mest var.

Tilkynning um eldinn barst klukkan 13:52 og var strax allt tiltækt slökkvilið sent á staðinn. Eldur var bæði í húsunum að Lækjargötu 2 og Austurstræti 22.

Slökkviliðið var komið á staðinn sex mínútum síðar. Fyrstu menn á vettvang gerðu sér strax grein fyrir hversu mikið umfang brunans var og því ákveðið að kalla allt starfsfólk slökkviliðsins út. Hundrað og tíu manns voru að störfum þegar mest var.

Mikill eldur var í þaki Austurstrætis 22 og eldtungur stóðu út um glugga Lækjargötu 2. Reykkafarar voru strax sendir inn. Klukkan tvö lokaði lögreglan götum í kring. Reykur stóð í suðvestur og lagði yfir nærliggjandi hús, allt að Háskóla Íslands. Fjöldi fólks safnaðist saman í Lækjagötu til að fylgjast með slökkvistarfinu.

Um klukkan hálf þrjú var búið að ná stjórn á eldinum. Enn var þó hætta til staðar en slökkviliðinu hafði tekist að koma í veg fyrir að eldurinn færi í nærliggjandi hús. Um þrjú leytið komu slökkviliðsmenn frá Brunavörnum Suðurnesja til að aðstoðar. Rétt fyrir klukkan fjögur tókst slökkviliðinu að slökkva að mestu eldinn í Lækjargötu 2. Eldur logaði þó enn glatt í Austurstræti 22.

Um fjögur leytið var óttast að þakið á Austurstræti 22 væri að hrynja. Á sama tíma kom krani frá Hringrás á staðinn og var hann notaður til að rífa húsið og slökkvistarfi innandyra hætt. Um fimm leytið féll þakið á Austurstræti 22, þar sem skemmtistaðurinn Pravda var til húsa.

Slökkvilið höfuðborgarsvæðisins, lögregla og borgaryfirvöld héldu blaðamannafund klukkan sex. Á honum var greint frá því að talið væri að eldurinn hefði kviknað í söluturni á milli húsanna í Austurstræti og Lækjartorgi.

Um kvöldmatarleytið tókst að ráða niðurlögum eldsins. Lögreglan ákvað að hafa aukinn viðbúnað í miðbænum yfir nóttina. Tólf slökkviliðsmenn, dælubíll og körfubíll voru áfram á staðnum og síðar um kvöldið var slökkviliðsmönnum á svæðinu fækkað niður í átta.

Slökkvistarfi lauk klukkan sex í morgun og fóru slökkviliðsmenn af vettvangi klukkan sjö. Þá voru sautján klukkustundir síðan að fyrstu mennirnir mættu á vettvang. Í morgun tók svo við frágangur á tækjum og búnaði.