Beðið eftir niðurstöðum úr sýntaökum úr hval

Ekki biti af hvalkjöti hefur selst frá því að veiðar hófust í október í fyrra og eru hátt í hundrað tonn af kjöti nú í frystigeymslum. Beðið er eftir niðurstöðum úr sýnatöku að utan, en án gæðavottunar er ekki hægt að selja kjötið úr landi. Ályktað var á Landsfundi Sjálfstæðisflokksins um helgina að mikilvægt væri að nýta hvali eins og aðrar auðlindar sjávar.

Kristján Loftsson, framkvæmdastjóri Hvals hf., segir að ekkert kjöt verði selt úr landi fyrr en það hefur fengið gæðavottun erlendis frá. Hann segir að án tilskilinna vottorða seljist hvalkjötið ekki en sýni úr því voru send út fyrir jól.

Með rannsóknum er meðal annars kannað hvort kjötið innihaldi eiturefni á borð við PCB og kvikasilfur. Að sögn Kristjáns hefur það tekið mun lengri tíma að fá niðurstöður úr sýnatökunni en reiknað var með í fyrstu. Hann vísar alfarið á bug þeim sögusögnum að kjötið seljist ekki því kaupendur í Japan bíði eftir því.

Hvalveiðar hófust að nýju eftir tæplega tuttugu ára hlé þann 19.október í fyrra og voru veiddar sjö langreyðar. Landsfundur Sjálfstæðisflokksins sem haldinn var um helgina ályktaði að eðlilegt teldist að veiðar sjávarspendýra féllu undir sjálfbæra nýtingu auðlinda hafsins.

Þá segir: „Mikilvægur áfangi náðist þegar hvalveiðar í atvinnuskyni hófust á ný á síðasta ári. Helstu hvalastofnar við landið eru stórir og samkvæmt rannsóknum Hafrannsóknastofnunarinnar hafa hvalir töluverð áhrif á stærð helstu nytjastofna. Enda þótt hvalveiðar séu umdeildar, er mikilvægt að Íslendingar nýti hvali eins og aðrar auðlindir sjávar á ábyrgan hátt."

Áætlað er að það megi veiða 9 langreyðar og 30 hrefnur á þessu fiskveiðiári.