Tíu skref að grænni borg

Eigendur vistvænna bíla fá ókeypis í stæði borgarinnar og námsmenn í Reykjavík fá frítt í Strætó frá og með næst hausti. Þetta er hluti af nýrri tíu skrefa áætlun Reykjavíkurborgar í umhverfismálum.

Borgarstjóri og borgarfulltrúar meirihlutans í Reykjavík kynntu þessa nýju tíu skrefa áætlun í dag, undir kjörorðinu Græn skref í Reykjavík. Með þess sem verður gert er Pósthússtræti meðfram Austurvelli verður gert að göngugötu á góðviðrisdögum.

Miklatún verður endurskipulagt og kaffihúsi komið fyrir í Hljómskálagarðinum. Þá verður boðið upp á bláar ruslatunnur fyrir pappír, en með þv í einu að flokka pappír segir borgarstjóri að minnka megi urðun um 30 prósent. Hvetja á fólk til að ganga og hjóla meira með því að bæta göngustíga borgarinnar, fjölga bekkjum við þá og fjölga vatnspóstum.

Vilhjálmur Þ. Vilhjálmsson borgarstjóri segir að styrkja eigi göngustígakerfið. Göngustígurinn frá Ægissíðu upp í Breiðholt verði t.a.m. tvöfaldaður á breiddina.

Þá verður hreinsunarátaki borgarinnar haldið áfram og farið í átak í Vesturbæ, miðbæ og Grafarholti og ráðist gegn veggjakroti. Borgarstjóri biður graffara að hugleiða það mikla tjón sem þeir valda einstaklingum, fyrirtækjum og sveitarfélaginu. Það kosti Reykjavík um 100 milljónir króna á ári að þrífa veggjakrot.

Á næstu árum verður farið í að endurbæta lóðir leik- og grunnskóla í borginni. "Margar skólalóðir eru ekki börnum bjóðandi," segir borgarstjóri. Þær þurfi að laga og það verði gert á næstu árum.

Fólki verður umbunað fyrir að keyra á vistvænum bílum. Gísli Marteinn Baldursson formaður umhverfissviðs borgarinnar segir að sífellt fleiri tvinnbílar sjáist á götum borgarinnar. Slíkir bílar verði gjaldfrjálsir á stæðum borgarinnar ásamt fleiri bílum sem menga lítið.

Og í haust fá námsmenn í Reykjavík frítt í strætó. Með þessu segir Gísli Marteinn að borgaryfirvöld vilji hvetja ungt fólk til að nota strætisvagnana, en með því að fresta því t.d. um eitt ár að kaupa bíl, geti námsmaður sparað sér allt að 800 þúsund krónur.