Barnabætur hækka um fjórðung

Áætlað er að framlög ríkisins til barnabóta fari úr 6,8 milljörðum króna á síðasta ári og upp í 8,5 milljarða króna á þessu en þetta er fjórðungs hækkun. Tvennt kemur þar til. Lögum hefur verið breytt þannig að greiðslur barnabóta ná nú til 18 ára aldurs í stað 16 ára aldurs. Ennfremur hefur verið dregið úr tekjuskerðingu barnabóta. Árni M. Mathiesen fjármálaráðherra sagði í þingumræðu á lokadegi Alþingis að þessar breytingar þýddu að raungildi barnabóta yrði í ár það hæsta frá árinu 1991 og sem hlutfall af landsframleiðslu það hæsta í áratug.

En skoðum dæmi um hvað fólk mun fá í barnabætur. Þær verða áfram óskertar fyrir börn yngri en 7 ára, eða kr. 14.024 krónur í hverjum ársfjórðungi en þetta eru fjórar greiðslur á ári. Fyrir börn yngri en 18 ára greiðast auk þess með tekjutengdar bætur, með fyrsta barni um 35 þúsund krónur, fjórum sinnum á ári, en með hverju barni umfram eitt um 41.500 krónur ársfjórðungslega. Bætur einstæðra foreldra eru 43-66% hærri. Fæstir foreldrar fá hins vegar þessar greiðslur óskertar. Þannig byrja bæturnar að skerðast hjá hjónum ef samanlagðar tekjur þeirra ná 186.000 krónum á mánuði. Hvort um sig má því hafa 93 þúsund króna mánaðartekjur til að fá óskertar barnabætur. Bæturnar skerðast því meira sem tekjurnar eru hærri og þær eru að fullu skertar, ef mánaðartekjur foreldrameð tvö börn ná samtals 612 þúsund krónum og eru þá allar tekjur taldar með, einnig fjármagnstekjur. Á síðasta var tekjuhámark þessara hjóna um 520 þúsund. Ef börnin eru þrjú hverfa bæturnar alveg við 677 þúsund króna mánaðartekjur samtals, samanborið við 590 þúsund króna tekjuhámark í fyrra.

Samhliða því að barnabætur verða nú greiddar til 18 ára aldurs verður aldursmark, til að fá sérstaka ívilnun vegna menntunarkostnaðar barna, einnig breytt úr 16 árum í 18 ár.