Hermann og Jóhannes Karl ekki með gegn Spánverjum

Tvö stór skörð voru í dag höggvin í íslenska landsliðshópinn fyrir leikinn gegn Spánverjum í undankeppni EM þann 28. mars næstkomandi. Þeir Hermann Hreiðarsson og Jóhannes Karl Guðjónsson geta ekki tekið þátt í leiknum.

Hermann Hreiðarsson er meiddur og kona Jóhannesar Karls á von á barni. Í stað þeirra koma þeir Hólmar Örn Rúnarsson frá Silkeborg og Indriði Sigurðsson hjá Lyn inn í hópinn. Hólmar hefur enn ekki spilað leik með íslenska landsliðinu og er því þriðji nýliðinn í hópnum að þessu sinni.