Vestfirðingar misstu af uppsveiflunni

Vestfirðingar hafa misst af uppganginum í tengslum við stóriðju og misst frá sér aflaheimildir á undanförnum árum og það hefur sitt að segja um bágt atvinnuástand að mati forsætisráðherra. Hann telur ekki koma til greina að veita fyrirtækjum á jaðarsvæðum skattaívilnanir til að hvetja til atvinnustarfsemi á landsbyggðinni.

Ríkisstjórnin ákvað í morgun að skipa fulltrúa úr ráðuneytum formanna stjórnarflokkanna í viðræðunefnd við Vestfirðinga til að kanna hverning ríkisvaldið getur komið að því að styðja við uppbyggingu atvinnulífs á Ísafirði. En Ísfirðingar hafa kallað eftir aðgerðum stjórnvalda vegna síversnandi stöðu í atvinnumálum, nú síðast með brotthvarfi Marels úr bænum.

Geir H Haarde forsætisráðherra segir að meðal annars verði farið yfir hugmyndir heimamanna um aðkomu stjórnvalda.

"Þeir hafa farið á mis við uppbygginguna sem tengst hefur stóriðju t.d. á Austurlandi og hér í nágrenni höfuðborgarinnar. Það er ein skýring. Síðan hafa náttúrlega aflaheimildir flust frá Vestfjörðum. Nýjasta vandamálið er svo að hátæknifyrirtækið Marel hyggst loka sinni starfsstöð þar. En þar hefur veruð mikill vaxtabroddur í hátæknistarfsemi sem á rætur að rekja langt aftur í tímann á Ísafirði, þar sem menn hafa verið mjög framsýnir og duglegir í því máli," segir forsætisráðherra.

Fyrir Alþingi liggja frumvörp sem miða að því að fá kaupskipaútgerðir til að skrá skip sín á Íslandi að nýju, með því að bjóða þeim skattaívilnanir. Geir telur erfitt að grípa til einhverra slíkra aðgerða til að skjóta stoðum undir atvinnulíf fyrir vestan.

"Við skulum ekki reikna með slíku en allt verður þetta skoðað í þessum vinnuhópi sem fær það verkefni að vinna hratt í málinu," segir Geir H Haarde forsætisráðherra.