Leggur til að ráðist verði í gerð Bakkafjöruhafnar

Stýrihópur sem samgönguráðherra skipaði til að fjalla um hafnargerð í Bakkafjöru vegna Vestmannaeyjaferju leggur til að ákveðið verði að ráðast í gerð hafnarinnar og smíði nýrrar ferju þannig að höfnin verði til 2010.

Fram kemur í skýrslu stýrihópsins, sem kynnt var á ríkisstjórnarfundi í morgun, að hafnagerðin sé tæknilega möguleg, kostnaður innan hóflegra marga og áhrifin af framkvæmdinni séu jákvæð bæði fyrir Vestmannaeyinga og nágrannasveitarfélög á landi. Ferjuhöfn í Bakkafjöru sé góður kostur í almenningssamgögnum milli Vestmannaeyja og lands um alllanga framtíð.

Stýrihópurinn leggur jafnframt fram tímaáætlun þar sem meðal annars kemur fram að á þessu ári yrði ráðist í mat á umhverfisáhrifum, hugsanleg jarðakaup, frumhönnun og annan undirbúning, á næsta ári verði unnið við nauðsynlega vegalagningu, grjótnám og gerð grjótgarðs sem standi fram á árið 2009 en þá verði einnig hafist handa við sjálfa bryggjugerðina og nauðsynleg innkaup. Þá er gert ráð fyrir að hönnun ferju fari fram árið 2008 og smíði hennar standi fram á árið 2010. Gert er ráð fyrir að ferjuútboðið verði einkaframkvæmd.

Fram kemur á vef samgönguráðuneytisins að opnaður verði tengill á síðunni á sérstakan upplýsingavef um málefni Bakkafjöru og þar verðui að finna ýmsar skýrslur sem unnar hafa verið í tengslum við verkefnið.