Innlent

Hamingjuóskum rignir yfir Varmársamtökin

Bryndís Schram mótmælir með því að taka sér sæti fyrir framan vinnuvélina.
Bryndís Schram mótmælir með því að taka sér sæti fyrir framan vinnuvélina. MYND/Stöð 2

„Þetta er viðurkenning á því sem við höfum verið að berjast fyrir og áfangasigur fyrir skipulagsmál almennt á Íslandi," sagði Sigrún Pálsdóttir stjórnarmaður Varmársamtakanna. Bæjarráð Mosfellsbæjar ákvað í morgun að endurskoða deiliskipulagsgögn fyrir Helgafellsveg um Álafosskvos og auglýsa skipulagstillöguna ásamt umhverfisskýrslu að nýju.

Sigrún segir að lögin um mat á umhverfisáætlunum, sem tóku gildi á síðasta ári, verði til þess að Íslendingar þurfi að endurskoða skipulagsmál sín.

Hún sagði hamingjuóskum rigna yfir samtökin, bæði frá félagsmönnum og fólki sem hefur fylgst með baráttu samtakanna.

Skipulagsstofnun ákvað í gær að deiliskipulag tengibrautarinnar falli undir ákvæði laga um umhverfismat áætlana. Á vef Mosfellsbæjar kemur fram að bærinn hafi óskað eftir því að stofnunin skæri úr um hvort deiliskipulagið félli undir nýju lögin.

Varmársamtökin hafa barist gegn lagningu Helgafellsbrautar meðal annars með mótmælum, en frægt er þegar Bryndís Schram settist fyrir framan stórvirka vinnuvél og stöðvaði þannig vinnu hennar.

Á stjórnarfundi samtakanna í kvöld verður tekin ákvörðun um hvernig samtökin muni fagna þessum sigri.


Tengdar fréttir

Minni hljóðmengun af tengivegi við Álafosskvísl

Tengibrautin við Helgafellshverfi í Mosfellsbæ verður lækkuð um tvo metra næst Álafosskvosinni og færð fjær Varmá. Mosfellsbær hefur lagt sérstaka áherslu á að takmarka hljóðmengun frá veginum. Í fréttatilkynningu frá bænum segir að strangari reglum verði fylgt en lög kveði á um.

Bæjarstjóri á „flæmingi“ undan lögunum

Varmársamtökin segja að bæjarstjóri Mosfellsbæjar hafi farið með rangt mál í fréttum í gærkvöldi varðandi mat á umhverfisáhrifum af tengibraut um Álafosskvos. Ragnheiður Ríkharðsdóttir bæjarstjóri sagði að vegna úrskurðar umhverfisráðherra um náttúruminjaskrá, hafi bænum ekki borið skylda til að óska eftir umsögn Umhverfisstofnunar um umhverfisáhrif. Þetta segja Varmársamtökin rangt.

Tengibrautin í samræmi við lög

Bæjarstjóri Mosfellsbæjar segir að heimild til að veita framkvæmdaleyfi fyrir tengibraut um Álafosskvísl hafi verið skýr og í fullu samræmi við lög og reglur. Gengið hafi verið úr skugga um það á fundi bæjarins með fulltrúum Umhverfisstofnunar 5. febrúar. Ekki hafi þurft að leita umsagnar Umhverfisstofnunar í þriðja sinn.

Bryndís Schram og Sigur Rós stöðva framkvæmdir í Mosó

Framkvæmdir við tengibraut um Álafosskvos í Mosfellsbæ voru stöðvaðar í dag í kjölfar mótmæla íbúa á svæðinu. Meðal þeirra sem tóku þátt í mótmælunum var Bryndís Shcram fjölmiðlakona sem tók sig til og settist fyrir framan vinnuvélar og stöðvaði þannig vinnu þeirra.

Mest lesið


Fleiri fréttir

Sjá meira


×

Mest lesið