Sérfræðingar sjá mikla annmarka á auðlindatillögu

Flestir þeir sérfræðingar, sem komið hafa fyrir stjórnarskrárnefnd í gær og í dag, telja að tillaga stjórnarflokkanna til breytingar á stjórnarskránni auki réttaróvissu um eignarhald á auðlindum. Fulltrúar útgerðarmanna segja tillöguna engu breyta um að handhafar veiðiheimilda eigi heimildirnar og þær verði ekki afturkallaðar án bóta.

Alþingi lauk fyrstu umræðu um stjórnarskrármálið í gær og vísaði því til stjórnarskrárnefndar sem fundaði um málið í gærkvöldi. Nefndin kom aftur saman til fundar í morgun, en hún hefur kallað til sín fjölda sérfræðinga til að gefa álit sitt. Össur Skaprhéðinsson annar fulltrúa Samfylkingarinnar í nefndinni efast um að málið fái afgreiðslu á þessu þingi og efast jafnvel um að stjórnarflokkarnir hafi áhuga á því að koma því óbreyttu í gegn.

"það er satt að segja búið að skjóta það alveg í tætlur í meðferð nefndarinnar og enginn af þeim níu sérfræðingum sem komið hafa fyrir nefndina hafa lokið lofsorði á ákvæðið," segir Össur. þeir segðu allir að það yki réttaróvissu.

Össur segir suma sérfræðingana jafnvel segja að ákvæðið styrki kvótakerfið í sessi og geri löggjafanum erfiðara fyrir að breyta því. Málið gæti því vera að þróast í þveröfuga átt miðað við markið þeirra sem lögðu af stað með það.

Forysta samtaka útgerðarmanna mætti á fund nefndarinnar í morgun, en framkvæmdastjóri LÍÚ telur óþarfa að setja ákvæði sem þetta inn í stjórnarskrá, enda hafi ríkið allar valdheimildir til að stjórna veiðunum.

"Við höfum náttúrlega rétt nú þegar og svo greinir menn á hvort hann er beinn eignaréttur eða óbeinn og honum verður auðvitað ekkert breytt, hvort sem er með stjórnarskrá eða með almennum lögum," segir Friðrik Arngrímsson framkvæmdastjóri Landsambands íslenskra útvegsmanna (LÍÚ).

Friðrik segir alveg ljóst að eignarréttindi útgerðarmanna, bein eða óbein, séu stjórnarskrávarin.

Bjarni Benediktsson, Sjálfstæðisflokki, fór yfir það á fundi Auðlindaréttarstofnunar Háskólans í Reykjavík í dag, hverning reynt hefur veriða að finna auðlindamálum stað í stjórnarskrá á undanförnum árum. Hann reifaði síðan hvað hann teldi vera markmiðið með því að koma ákvæði um auðlindir inn í stjórnarskrána nú.

"Meginmarkið frumvarpsins er einfaldlega pólitísk yfirlýsing. Þetta kom skýrt fram hjá forsætisráðherra þegar hann fylgdi málinu eftir," sagði Bjarni. Pólitísk yfirlýsing sem áréttaði fullveldisrétt ríkis og þjóðar yfir þeim auðlíndum sem væri að finna á íslensku forráðasvæði , sem ekki lytu eignarrétti annarra og þær skyldu nýttar með heildarhagsmuni þjóðarinnar að leiðarljósi.