Britney forðast Paris eins og plágu

Partýprinsessurnar Britney Spears og Paris Hilton hafa æ oftar sést saman undanfarið en það virðist sem vináttusamband þeirra sé farið forgörðum. Þær eru báðar á tískuvikunni í New York og höfðu áform um að fara á Heatherette tískusýninguna. Það varð þó ekki af því. Þær hættu báðar við að mæta af ótta við að rekast á hvora aðra, samkvæmt heimildum New York Daily News.

Paris hafði átt að koma fram sem fyrirsæta á tískusýningunni en Britney átti sæti í fremstu röð við sviðið. Það varð úr að París aflýsti komu sinni, en getgátur eru uppi um það að hún hafi verið með timburmenn, eftir að hafa tekið nokkur tequila skot með Brandon Davis, kvöldið áður. Opinbera skýringin á fjarveru Parisar var sú að hún væri með magaverk. Britney vissi aftur á móti ekki af því að Paris hefði hætt við. Hún snéri við á bílastæðinu, tíu mínútum fyrir sýninguna, af ótta við að rekast á Paris.

Það virðist því vera kalt í kolunum á milli þessa tveggja partýprinsessa, það kalt, að Paris er sögð nefna Britney ,,Dýrið" við vini sýna.