Ljósastaurar brotnuðu í Hlíðarfjalli í fárviðri

Ljósastaurar brotnuðu í Hlíðarfjalli í fárviðrinu sem gerði laust fyrir jól. Lítið varð úr þeim skíðajólum sem margir vonuðust eftir en þó var opið nokkra daga í fjallinu milli jóla og nýárs.

Guðmundur Karl Jónsson, forstöðumaður skíðasvæðis Akureyringa, segir að mjög dapurt ástand hafi verið í fjallinu síðustu daga. Aftakahláku gerði laust fyrir jól með þeim afleiðingum að gríðarmikill skíðasnjór sem safnast hafði í brekkur Hlíðarfjalls bráðnaði allur. Aðeins tilbúni snjórinn hélt velli en þó varla meir en svo.

Þó var opið í fjallinu fjóra daga milli jóla og nýárs en aðstæður til skíðaiðkunar voru erfiðar. Það er þó huggun harmi gegn að uppistöðulónið nýja í fjallinu sem notað er til að búa til snjó með vélum hélt velli og skemmdist ekki í flóðunum.

Hins vegar féllu minni háttar aurskriður og ljósastaurar brotnuðu þegar hvassast var. Vindhraði sló í 57 metra á sekúndu á Þorláksmessu sem er með því mesta, en suðvestanáttinn er skíðasvæðinu skæð að sögn forstöðumanns. Nú er útlit fyrir norðlægar áttir og batnandi skíðatíð að sögn Guðmundar Karls Jónssonar.