Íslendingar meðal þeirra bestu í heimi í nýsköpun

Íslendingar eru meðal fremstu þjóða heims samkvæmt bandarískum lista yfir hnattræna sköpunargáfu. Bandaríski prófessorinn Richard Florida hrósar Íslendingum í hástert fyrir sköpunarþrótt í nýlegri metsölubók.

Í nýlegri metsölubók, "Flugi Sköpunarstéttanna," fjallar bandaríkjamaðurinn Florida á afar jákvæðan hátt um Ísland og styrk þess á alþjóðavísu, sérstaklega hvað varðar sköpunargáfu.

Íslenska útrásin er skýrt dæmi sem á upphaf sitt í þessari sköpunargáfu.

Flordia bendir á að frjó hugsun sé einn mikilvægasti drifkrafturinn í efnahagslífi þjóða. Rögnvaldur J. Sæmundsson, sérfræðingur í frumkvöðlafræðum við Háskólann í Reykjavík, segir að Íslendingar eigi mikil verðmæti í miklu frumkvæði sínu.

Richard Flordia segir að Bandaríkjamönnum sé að hraka í nýsköpun og frumkvæðið sé að fara yfir til þjóða eins og Kanadamanna, Íslendinga og Svisslendinga.

Samkvæmt lista Florida yfir þróttmestu þjóðir heims í nýsköpun eru Íslendingar í sjöunda sæti. Ofar eru Danir, Svisslendingar, Bandaríkjamenn, Finnar, Japanir og Svíar, sem tróna á toppnum.

Rögnvaldur segir að í sköpun geti verið kostur að hafa verið einangraður eins og Íslendingar sem komi að verkefnum með nýja sýn.

Um helgina var ráðstefna á vegum Háskólans í Reykjavík þar sem sköpun var viðfangsefnið. Aðalræðumaðurinn var sænski frumkvöðlasérfræðingurinn Fredrik Härén.

Eitt af sköpunarverkum Íslendinga segir hann vera nýyrðasmíðina sem kalli á frumleika og sköpun frekar en að fara léttari leiðina með því að sletta eins og margar aðrar þjóðir gera.

Hann tekur sem dæmi orðið "íde", sem Íslendingar fúlsi við og noti í þess stað orðið "hugmynd" yfir sama fyrirbæri. "Íde" eða hugmynd er reyndar kjarninn í nýsköpun.

Vissulega góð "hugmynd" hjá Íslendingum segir Härén.