Heilbrigðiskerfið of flókið

Læknafélagið vill að stofnað verði embætti umboðsmanns sjúklinga sem standi vörð um réttindi þeirra. Heilbrigðiskerfið er of flókið og sjúklingar þekkja ekki réttindi sín segir fyrsti kvenformaðurinn í 90 ára sögu Læknafélagsins.

Aðalfundur Læknafélagsins var haldinn um helgina og tók Birna Jónsdóttir röntgenlæknir við af Sigurbirni Sveinssyni heimilislækni sem gegnt hefur formannsembættinu í átta ár. Tvær ályktanir fundarins snéru að almannatryggingum. Læknafélagið skorar á heilbrigðisráðherra að skilgreina sjúkratryggingar upp á nýtt . Þá vill félagið að settur verði umboðsmaður sjúklinga sem standi vörð um réttindi þeirra. Birna segir almannatryggingakerfið alltof flókið og hún verði sérstaklega vör við það að sjúklingar þekki ekki réttindi sín.

Birna segir að umboðsmaður sjúklinga gæti haft eftirlit með heilbrigðiskerfinu og bent á brotalamir í því fyrir hönd sjúklinga. Því sé mikilvægt að sjúklingar hafi málsvara.

Birna segist ánægð með að vera orðinn formaður Læknafélagsins. Hún hafi unnið að því lengi og sé glöð með árangurinn. Birna ætlar að beita sér fyrir hagsmunamálum lækna og ætlar að vera virk í þjóðfélagsumræðunni.