Bæjarstjórinn kominn út úr skápnum

Talsmaður Sólar í Straumi segir bæjarstjórann í Hafnarfirði kominn út úr skápnum með stuðningi sínum við að álverið í Straumsvík geti mögulega stækkað t.d. með byggingu á landfyllingu. Hann segir kosningarnar í vetur ekki hafa snúist um skipulag lóðar álversins, heldur öll þau áhrif sem stækkað álver hefði á fjölmörgum sviðum.

Alcan sem rekur álverið í Straumsvík hefur tíu daga til að koma fram með hugmyndir sem sannfæra Landsvirkjun um að Alcan muni kaupa þá raforku sem gert er ráð fyrir í viljayfirlýsingu milli fyrirtækjanna frá því í lok júní í fyrra. Sú yfirlýsing felur í sér kaup Alcans á 60 prósentum þeirrar orku sem fyrirtækið þyrfti til stækkunar álversins. Yfirlýsingin gilti í sex mánuði en var framlengd um aðra sex mánuði um áramót og rennur úr gildi hinn 30. júní næst komandi.

Alcan hefur óskað eftir fundi með forráðamönnum Landsvirkjunar á næstu dögum. Þorsteinn Hilmarsson upplýsingafulltrúi Landsvirkjunar segir að Alcan þurfi að leggja fram eitthvað nýtt og raunhæft á þeim fundi til að Landsvirkjun samþykki að framlengja yfirlýsinguna. Í Morgunblaðinu í morgun segir Lúðvík Geirsson bæjarstjóri í Hafnarfirði að það skipti máli að Alcan haldi áfram starfsemi í bænum og er reiðubúinn til að skoða hugmyndir þar að lútandi.

"Ég held að það megi segja það núna að bæjarstjórinn sé kominn út úr skápnum með sína skoðun á þessu máli. Hann hefur frá því niðurstaða lá fyrir í þessu máli tekið þátt í spekúlasjónum um hvernig væri hægt að snúa út úr þessari niðurstöðu," segir Pétur Óskarsson talsmaður Sólar í Straumi og vísar þá til niðurstöðu kosninga um deiluskipulag í Hafnarfirði í lok mars.

Bæjarstjórinn segir í Morgunblaðinu að í kosningunum hinn 30. mars hafi verið kosið um deiliskipulagstillögu og Alcan hafi rétt á að koma fram með aðrar hugmyndir og þá verði hægt að kjósa um annað deiliskipulag.

Pétur segir að umræðan í Hafnarfirði fyrir kosningarnar hafi snúist um heildaráhrif stækkunar álversins á umhverfið, samfélagið, fjárhag bæjarins og fleira, en ekki um deiliskipulagstillögu.

Stjórn Alcans fundaði um málið í morgun og mun hitta Össur Skarphéðinsson iðnaðarráðherra í dag. En fyrirtækið er líka að kanna möguleika á að byggja nýtt álver, t.d. á Keilisnesi eða í Þorlákshöfn, ef Hafnfirðingar hafna stækkun algerlega.

Pétur segir að ef fara eigi í nýjar kosningar um aðra deiliskipulagstillögu, sé ljóst að ráðamenn í Hafnarfirði hafi verið að hafa kjósendur að fíflum.