Óvíst hvort tekið verði við flóttamönnum á Möltu

Ekki er vitað hvað verður um tuttugu og einn flóttamann frá Afríku sem íslenskur skipstjóri ber nú ábyrgð á. Hópurinn er um borð í íslenskum togara sem siglir til Möltu en fólkið fannst í flotkvíum sem skipið dregur. Stjórnvöld á Möltu hafa ekki viljað gefa nein loforð um að þau taki við hópnum.

Flóttamennirnir fundust í gær í flotkvíum sem togarinn Eyborg frá Hrísey var með í eftirdragi. Togarinn er staddur á Miðjarahafinu en hann tók við flotkvíunum skammt frá landhelgi Líbýu af öðrum togara. Skipið hefur verið á þeim slóðum síðustu tvö árin.

Skipstjóri togarans er íslenskur en auk hans eru tveir Rúmenar og sex Indónesíumenn í áhöfninni.

Skipverjar urðu varir við fólkið í gær. Útgerðin hafði samband við utanríkisráðuneytið sem bað áhöfnina að koma fólkinu strax í björgunarbáta og var það tekið um borð í skipið í dag.

Einn úr hópi laumufarþega, eþíópísk kona, mun vera látinn en öðrum heilsast vel. Um er að ræða 17 Eþíópíumenn, þrjá frá Darfur í Súdan og einn Nígeríumann. Talið er að fólkið sé á aldrinum 18 til 32 ára.

Utanríkisráðuneytið hefur tilkynnt flóttamannastofnun Sameinuðu þjóðanna um málið, hún hefur haft samband við svæðisskrifstofur á Möltu og og Ítalíu, en talið er að fólkið hafi ætlað að reyna að komast þangað.

Samkvæmt lögum á að fara með flóttamennina til næstu öruggu hafnar sem er á Möltu. Skipið væntanlegt til Valetta á mánudagsmorgun.

Samkvæmt lögum er fólkið á ábyrgð skipstjórans þar til stjórnvöld á Möltu hafa tekið við hópnum. Íslensk stjórnvöld hafa sett sig í samband við þau vegna málsins. Þau hafa hins vegar ekki viljað gefa tryggingu fyrir því að þau taki við hópnum en þó sagt taka við þeim sem annað hvort eru veikir eða í hættu. Það er því óvíst hvað tekur við þegar þangað kemur.

Birgir Rafn Sigurjónsson, framkvæmdastjóri útgerðarinnar Borgar í Hrísey, sem á skipið, vildi ekki tjá sig um málið þegar eftir því var leitað.