Vilja byggja upp þjónustuíbúðir á gamla Fákssvæðinu

Samtök aldraðra, sem eru byggingarsamvinnufélag í borginni, hafa sótt um lóðir hjá borginni fyrir fjölbýlishús með þjónustumiðstöð fyrir aldraðra á nokkrum stöðum í borginni, þar á meðal á Fákssvæðinu neðst við Bústaðarveg og í Skerjafirði þar sem áður var birgðastöð Skeljungs.

Umsókn samtakanna var lögð fram á fundi borgarráðs í gær og var henni vísað til stýrihóps á vegum borgarinnar sem á að vinna að búsetuúrræðum fyrir eldri borgara.

Efla heimaþjónustu við aldraða

Björk Vilhelmsdóttir verður formaður stýrihópsins en í honum eiga fimm fulltrúar frá borginni sæti. Björk segir að stýrihópurinn taki við þeim verkefnum sem fyrri meirihluti hafi unnið að í uppbyggingu þjónustuíbúða fyrir aldraða. „Svo ætlum við að efla heimaþjónustu þannig að eldra fólk geti búið þar sem það vill og borgin veiti því þá þjónustu sem það þarf," segir Björk.

Hún segir margt í farvatninu og margir hafi óskað eftir lóðum til þess að byggja upp þjónustuíbúðir en verið sé að meta hversu mikil þörfin sé. Þegar það sé búið verði farið í að úthluta lóðum. Aðspurð segir Björk stýrihópinn munu starfa út kjörtímabilið enda þurfi stöðugt að vinna að búsetuúrræðum aldraðra.

Íbúðir byggðar á kostnaðarverði

Meðal þeirra félaga sem óskað hafa eftir að byggja fjölbýlishús með þjónusturými fyrir aldraða eru Samtök aldraðra bsf. Að sögn Sólveigar Guðmundsdóttur eru Samtök aldraðra byggingarsamvinnufélag. Þar leggur fólk leggur fé í samvinnufélagið sem byggir aftur íbúðir á kostnaðarverði. Félagið er opið öllum Reykvíkingum sem náð hafa 60 ára aldri.

Sólveig segir að félagið hafi fengið lóðir frá Reykjavíkurborg endurgjaldslaust og svo sé það í raun fólkið sjálft sem byggi upp íbúðirnar með því að leggja fram fé í þær. Félagið hafi þegar byggt upp 400 íbúðir í Reykjavík og var nýjasta húsið, sem er við Sléttuveg í Fossvogi, tekið í notkun í lok mars. „Fólk borgar kostnaðarverð fyrir íbúðina og afborganirnar eru jafnar og dreifast yfir 18 mánuði," segir Sólveig og bendir á að þetta geri fólki kleift að selja fyrra húsnæði sitt skömmu áður en það fær afhent nýjar íbúð í fjölbýlishúsi Samtaka aldraðra.

Borgin rekur þjónustumiðstöðvar

Í fjölbýlishúsunum er svo að finna þjónustumiðstöðvar á neðstu hæðinni þar sem fólk getur keypt máltíðir og fengið ýmsa þjónustu, þar á meðal læknisþjónustu. Samið hafi verið við borgina um að reka þessa þjónustu. Þá eru miðstöðvarnar opnar einnig fyrir gamalt fólk sem býr í nágrenni fjölbýlishúsanna.

Sólveig segir frekari uppbyggingu á vegum Samtaka aldraðra í bígerð. Samtökin hafi fengið vilyrði frá borginni fyrir lóð fyrir neðan Sléttuveg, skammt frá þeim stað þar sem nýjasta hús samtakanna er risið. „Við vonumst eftir að samningar um þá lóð takist þannig að við getum haldið áfram uppbyggingu," segir Sólveig. Til viðbótar hefur félagið óskað eftir lóðum undir fjölbýlishús ásamt þjónusturými á Fákssvæðinu neðst við Bústaðaveg, við Selás og í Skerjafirði þar sem áður var birgðastöð Skeljungs.