Næturlendingum fjölgar um 80 prósent á fimm árum

Nærri áttatíuprósent fleiri flugvélar lentu eða tóku á loft á Reykjavíkurflugvelli að næturlagi í fyrra en árið 2001.

Formaður samgöngunefndar Alþingis vill banna næturflug einkaþotna á Reykjavíkurflugvelli og hefur efasemdir um að hugmyndir samgönguráðherra um að hækka lendingargjöldin, sem nú eru að meðaltali tíu þúsund krónur á einkaþotu, dygðu til að draga úr flugumferð á næturna í Vatnsmýrinni.

Fréttastofa hefur fengið tölur frá Flugstoðum um næturhreyfingar sjö ár aftur í tímann. Árið 2000 sker sig úr en þá voru 553 vélar sem lentu eða tóku á loft að næturlagi. Skýringin á þessum fjölda mun vera, samkvæmt upplýsingum frá Flugstoðum, að einmitt þetta ár hafi borgarstjóri og samgönguráðherra gert með sér samkomulag um að draga úr næturumferð.

Sjúkraflug var á þessu árabili 8-19 prósent af næturumferðinni. Einhver hluti skýrist af seinkunum áætlunarvéla og sömuleiðis véla Landhelgisgæslunnar. Hins vegar er drjúgur hluti tilkominn vegna aukinnar flugumferðar einkaþotna. Næturflug einkaþotna á heima á Keflavíkurflugvelli og hvergi annars staðar, sagði formaður samgöngunefndar í gær. Eigendur einkaþotna og flugvallaryfirvöld virðast ekki líta svo á.