Skoða fasteignakaup á Keflavíkurflugvelli

Formaður fjárlaganefndar Alþingis hyggst láta þingnefndina kanna fasteignakaup Þorgils Óttars Mathiesens, bróður Árna Mathiesens fjármálaráðherra, á Keflavíkurflugvelli og hefur jafnframt óskað eftir því að bæði Ríkisendurskoðun og efnahags- og skattanefnd Alþingis komi að málinu.

Þessu lýsti Gunnar Svavarsson, formaður fjárlaganefndar, yfir á Alþingi í gær eftir að Atli Gíslason, þingmaður Vinstri grænna, hafði gagnrýnt söluna og sagt lög brotin með henni.

Gunnar sagði í umræðum um fjáraukalög á Alþingi í gær að eignamál á fyrrum varnarsvæðinu á Keflavíkurflugvelli yrðu skoðuð á milli umræðna um frumvarpið.

Sagðist hann jafnframt hafa kynnt fjármálaráðherra að fjárlaganefnd hefði óskað eftir því að taka upp þessi mál auk þess sem hann hefði rætt við Ríkisendurskoðun að kanna málið. Sömuleiðis hefði hann rætt við Pétur H. Blöndal, formann efnahags- og skattanefndar, um að sú nefnd skoðaði málið.

Gunnar ítrekaði umræddar eignir hefðu vissulega verið til sölu og hefðu verið kynntar til sölu samkvæmt upplýsingum frá Þróunarfélagi Keflavíkurflugvallar. Þetta myndi skýrast í svörum sem fjárlaganefnd og efnahags- og skattanefnd fengju varðandi málið.