REI og GGE fannst tilboð First Gen allt of hátt

REI og Geysir Green Energy voru ekki með í tilboði í orkuveitu Filipseyja. Ástæða þess mun vera sú að verðhugmyndir íslendinganna voru allt aðrar en samstarfsaðilans First Gen. Samkomulag mun hafa verið á meðal fyrirtækjanna um að kæmu menn sér ekki saman um verðið í hlut Filipseyska ríkisins í orkuveitunni, gæti sá sem vildi bjóða hærra gert það án aðildar hinna.

Heimildir Vísis herma að verðhugmyndir REI og Geysis hafi verið einhversstaðar mitt á milli þess sem First Gen vildi bjóða og þess lágmarksverðs sem var krafist í útboðinu. Þegar tilboð í hlutinn voru opnuð í morgun kom í ljós að First Gen og tvö önnur félög buðu 58,5 milljarðar pesóa, eða 84 milljarða íslenskra króna.

Einkavæðingarnefnd Filipseyja hafði krafist 45 milljarða pesóa fyrir hlutinn í það minnsta og voru First Gen og félagar með langhæsta tilboðið. Heimildir Vísis herma að hefðu REI og GGE fengið sínu fram hefði tilboð þeirra orðið það þriðja hæsta en næsthæsta tilboðið hljóðaði upp á 48,5 milljarða pesóa.