Lögmæti stjórnarfundar OR orkar tvímælis

Lögmæti hins afdrifaríka stjórnarfundar í Orkuveitu Reykjavíkur á miðvikudaginn orkar tvímælis segir Lára V. Júlíusdóttir, hæstaréttarlögmaður. Á fundinum var samruni orkuútrásarfyrirtækjanna samþykktur. Svandís Svavarsdóttir, fulltrúi Vinstri grænna í stjórninni, íhugar að kæra fundinn og fá niðurstöðu hans hnekkt.

Á átakafundi í stjórn Orkuveitu Reykjavíkur síðdegis á miðvikudag var meðal annars deilt um lögmæti fundarins en fundarstjóri var formaður Lögmannafélagsins, Helgi Jóhannesson. Boðað var til fundarins með innan við sólarhringsfyrirvara en samkvæmt samningi skal boðað til hans skriflega með vikufyrirvara.

Það fysta sem fundarstjóra ber að gera á slíkum fundi er að úrskurða um lögmæti hans og það gerði formaður Lögmannafélagsins á þessum tiltekna fundi. Hins vegar, segir Lára, skiptir máli fyrir niðurstöðu svona máls fyrir dómi, að allir þeir sem hafi hagsmuni að gæta og sitji í stjórn, hafi átt þess kost að koma sínum sjónarmiðum á framfæri. Allir stjórnarmenn mættu á fundinn - þrátt fyrir skamman fyrirvara - nema Dagur B. Eggertsson, fulltrúi Samfylkingarinnar, en í hans stað mætti varamaður.

Boðunarferlið er bæði til að tryggja að allir komist á fundi, en líka svo menn eigi þess kost að setja sig inn í mál - ekki síst fyrir mikilvæga fundi.