Þinglýstum kaupsamningum fjölgar um 90% milli ára

Þinglýstum kaupsamningum um fasteignir fjölgaði um 90 prósent hjá sýslumannsembættunum á höfuðborgarsvæðinu í september í ár miðað við sama tíma í fyrra. Þetta kemur fram á vef Fasteignamats ríkisins.

Þar kemur enn fremur fram að í september í ár hafi 924 samningum verið þinglýst en þeir voru 486 í sama mánuði í fyrra. Þá jókst veltan um nærri 130 prósent milli ára. Hún var 31 milljarður í september í ár en 13,5 í september 2006.

Tölur fasteignamatsins leiða enn fremur í ljós að kaupsamningum fjölgaði um sjö prósent á milli ágústmánaðar og september í ár en veltan jókst hins vegar um nærri fjórðung.