Vorum bestu vinir þangað til hann byrjaði í neyslu

Guðjón Guðmundsson lést í fangelsi í Kaupmannahöfn í síðasta mánuði. Hann var einungis 32 ára gamall. Bróðir hans, Brynjar Karl Guðmundsson, hefur sett upp svokallaða MySpace síðu til að minnast hans.

Í samtali við blaðamann Vísis sagðist Brynjar hafa sett upp síðuna til þess að halda minningu bróður síns lifandi. „Við vorum bestu vinir þangað til að hann byrjaði í neyslu og héldum alltaf sambandi. Ég ætla ekki bara að minnast hans núna heldur ætla ég að reyna að halda minningu hans á lofti eins lengi og ég get," segir Brynjar.

Brynjar segist ekki vita mikið um aðdraganda þess að bróðir hans lést. „Ég veit í raun ekkert meira en hver annar. Þetta kom mér í raun á óvart. Hann var búinn að eiga erfiða ævi en um það leyti sem hann dó var útlitið bjart hjá honum. Hann var nýbúinn að frétta að dómurinn yfir honum yrði mun styttri en hann hafði gert ráð fyrir í byrjun. Mamma og pabbi voru á leiðinni í heimsókn til hans, þannig að þetta leit allt saman ágætlega út, " segir Brynjar.

Fíkniefnaheimurinn er harður. Þekkt er að menn hafi verið beittir miklu ofbeldi og jafnvel verið myrtir vegna fíkniefnaskulda. Brynjar segist eiga bágt með að trúa því að bróðir hans hafi framið sjálfsmorð. Hann viti ekkert með fullri vissu fyrr en hann sjái kveðjubréf eftir hann. „Ég veit ekki til þess að nokkur hafi fyrirfarið sér án þess að skilja eftir svoleiðis bréf," segir hann.

Brynjar segir að Guðjón hafi dvalið í Danmörku í nokkra mánuði áður en hann fór í fangelsi. „Ég var að vona að hann gæti farið þangað til að hefja nýtt líf. Hann átti dóttur þarna sem honum þótti mjög vænt um og reyndi að eyða eins miklum tíma með og hann gat," segir Brynjar

Það er augljóst á viðbrögðunum sem Brynjar fær frá vinum þeirra bræðra á MySpace síðunni að Guðjón hefur átt marga að sem þóttu vænt um hann. Þar er honum lýst sem yndislegum strák og góðum dreng sem alltaf hafi verið gaman að vera í kringum. En fíkniefnadraugurinn er erfiður fjandi að berjast við.