Þýfi Litháana átti að nota til að fjármagna fíkniefnasölu

Þýfi fimmtán Litháa, sem nú hafa verið handteknir fyrir umfangsmikinn búðaþjófnað, var að öllum líkindum gjaldmiðill í fíkniefnaviðskiptum og áttu fíkniefnin að fara á markað hér. Öryggisvörður varð fyrir líkamsárás þegar hann reyndi að stöðva tvo þeirra við iðju þeirra.

Kona sem starfar sem öryggisvörður hjá Högum varð fyrir kröftugu olnbogaskoti og þeyttist í gólfið þegar hún reyndi að stöðva tvo meinta búðarþjófa í einni af verslunum 10-11 í Reykjavík.

Mennirnir eru taldir tilheyra hópi þeirra Litháa sem hafa verið handteknir vegna gruns um stórfellda þjófnaði í verslunum í Reykjavík.

Lögreglan á höfuðborgarsvæðinu handtók í gær fimmtánda Litháann sem talinn er tengjast þessum umfangsmikla hring. Sá var handtekinn eftir húsleit lögreglu í austurbænum en þar lagði lögregla hald á þýfi.

Forvígismenn Haga urðu með þeim fyrstu til að benda lögreglu á stórfellda þjófnaði sem stundaðir eru af erlendum einstaklingum hér á landi.

Samkvæmt upplýsingum sem Stöð 2 aflaði sér jókst búðahnupl verulega í verslunum hér á landi um mitt ár 2005. Það ár varð 70 prósent aukning á þjófnuðum þar sem útlendingar áttu í hlut.

Samkvæmt heimildum fréttastofu eru fíkniefnaneytendur stórtækasti hópur þeirra Íslendinga sem leggja stund á búðahnupl.

Yfirmaður öryggismála hjá verslun í Reykjavík segir að fíklar séu jafnvel sendir með innkaupalista þar sem er búið að merkja við í bæklingum verslana hvað fíkniefnasalarnir vilja fá í skiptum fyrir fíkniefnin.

Samkvæmt áreiðanlegum heimildum Stöðvar 2 var áformað að þýfið sem var í fórum Litháana hafi átt að nota sem gjaldmiðil í viðskiptum með fíkniefni og þau fíkniefni hafi átt að fara á markað hér á landi.

Sömu heimildir herma að Litháar séu nú að ná undirtökunum í fíkniefnaheiminum hér á landi.