Einfalda reglur stjórnsýslunnar á næstu tveimur árum

Ráðuneytin hyggjast á næstu tveimur árum einfalda reglur sem þau starfa eftir með það fyrir augum að auðvelda almenningi og fyrirtækjum samskipti við hið opinbera.

Fram kemur í tilkynningu á vef forsætisráðuneytisins að meðal þess sem ráðist verði í er að afnema óþarfa kröfur um leyfi og upplýsingagjöf af hálfu fyrirtækja, nýta betur kosti rafrænnar stjórnsýslu og bæta aðgengi almennings að upplýsingum um gildandi lög. Með þessu megi auk þess ná fram umtalsverðum sparnaði fyrir alla hlutaðeigandi án þess að það komi niður á meginmarkmiðum löggjafar eða stjórnsýslu.

Vonast ráðuneytin eftir góðu samstarfi við Alþingi og hagsmunaaðila í þeim tilvikum þar sem breyta þarf lögum. Ráðuneytin hafa lagt fram einföldunaráætlanir og má nálgast þær á heimasíðum þeirra. Þeim sem vilja koma á framfæri ábendingum varðandi framkvæmd áætlana er bent á að hafa samband við viðkomandi ráðuneyti.