Leitin að Þjóðverjunum er ein umfangsmesta leit björgunarmanna hér á landi

Leitin að Þjóðverjunum tveimur á Öræfajökli er með þeim umfangsmeiri sem farið hafa fram hér á landi. Mikill tækjabúnaður var notaður við leitina og álag á leitarmenn var óvenju mikið. Á þriðja hundrað manns kom að leitinni og vann meðal annars lögregla í Þýskalandi að rannsókn málsins í félagi við lögreglu hér á landi sem vann úr vísbendingum.

Eftir að tjöld Þjóðverjanna fundust voru kallaðir út allir þaulvanir fjallamenn Slysavarnafélagsins Landsbjargar. Það lætur nærri að klifur þeirra hafi jafnast á við það sem fjallamenn reyna sem ganga á Mount Everest en þeir fóru fjórum sinnum á hæsta tind landsins.

Samhæfingarstöð í Skógarhlíð var virkjuð að hluta en þar voru sex manns að störfum við mjög umfangsmikla rannsóknarvinnu, öflun upplýsinga og skipulag.

Á leitarsvæðinu lögðu margir mjög mikið á sig við að leita að Þjóðverjunum tveimur.

Ein tankbifreið var á staðnum til að sjá farartækjum fyrir eldsneyti. Tvö sexhjól voru notuð ásamt þremur fjórhjólum.

Leitarmenn höfðu sex vélsleða og einn stjórnstöðvarbíll var á plani framan við hótel Skaftafell.

Leitarmenn höfðu tvö gríðarlega stór uppblásanleg tjöld sem voru notuð sem bækistöðvar fyrir björgunarsveitamenn en 50 bifreiðar komu við sögu í leitinni.

Við leitina var stuðst við tvær þyrlur Landhelgisgæslunnar sem fluttu menn um leitarsvæðið auk þess sem áhafnir þeirra leituðu úr lofti við einhverjar þær erfiðustu aðstæður sem þekkjast hérlendis.

Fokker flugvél Gæslunnar var meðal annars notuð í flutningum á mannafla austur, bæði frá Reykjavík og Akureyri.

Á svæðinu var einn sporleitarhundur sem vann í félagi við þrjá svæðisleitarhunda sem eru einnig þjálfaðir til leitar í snjóflóðum.

Björgunarmenn lögðu á sig meira en fimm þúsund klukkustundir við vinnu en þeir hvíldust í 25 tjöldum og fengu rjúkandi mat frá konum úr slysavarnardeildinni Framtíðinni á Höfn.

Leitarmenn náðu rétt að halla sér eftir erfiði dagsins í 25 tjöldum á meðan þeir biðu dagrenningar. Að baki hverri stund í útkalli björgunarsveita liggja um 12 stundir í annarri vinnu, svo sem við þjálfun, viðhald tækja og fjáröflun.

Að auki eru björgunarsveitarmenn með mikinn eigin búnað, sérhæfðan útivistarfatnað, ísklifurbúnað, broddar, ísaxir og öryggistæki. Heildarkostnaður við leitina liggur ekki fyrir en nærri lætur að ef sá tími sem farið hefur í leitina yrði reikningsfærður væri 180 milljónir ekki fráleit tala.