Þyrla sækir tvo brunasjúklinga til Neskaupstaðar

Þyrla Landhelgisgæslunnar, TF Gná, lenti fyrir skömmu í Reykjavík með tvo brunasjúklinga. Annar þeirra brenndist illa í morgun þegar kviknaði í bíl hans í Fljótsdal. Hinn, sem er útlendingur, brenndist í gærkvöldi þegar hann steig út í hver við Mývatn.

Þyrlan var kölluð út um ellefuleytið í morgun eftir að beiðni barst frá sjúkrahúsinu á Neskaupstað um að sækja illa brenndan mann. Maðurinn hlaut sár sín eftir að kviknað hafði í bíl hans í Fljótsdal um níuleytið í morgun. Að sögn lögreglunnar á Egilsstöðum er talið að kviknaði hafi út frá gaskúti sem var inni í bílnum.

Á miðri leið til Neskaupstaðar barst Landhelgisgæslunni síðan beiðni um að sækja annan brunasjúkling. Um var að ræða útlending sem hafði hlotið 2. stigs brunasár á vinstri fæti eftir að hann steig út í hver við Mývatn í gærkvöldi. Sá var keyrður til Neskaupstaðar frá Mývatni þar sem þyrlan tók hann upp í.