Umhverfismat vegna virkjana í neðri Þjórsá, hneyksli að mati jarðfræðings

Ingibjörg Elsa Björnsdóttir jarð- og umhverfisfræðingur segir umhverfismat vegna virkjana í neðrihluta Þjórsár hneyksli og skammarlega illa gert. Stefán Thors skipulagsstjóri segir að umhverfismatsferlið vegna virkjananna hafi verið opið og lýðræðislegt og ítarlega fjallað um allar kærur sem bárust.

Ingibjörg Elsa starfaði hjá Línuhönnun í átta ár og vann að umhverfismatii meðal annars fyrir Suðurstrandaveg og færslu Hringbrautar, vekur máls á þessu á heimasíðu sinni. Hún segir meðal annars að Landsvirkjun ætli samkvæmt umhverfismatinu að byggja laxastiga þannig að laxinn komist upp yfir stíflurnar en ekki sé gert ráð fyrir því að seiðin komist niður ána. Þá segi í skýrslunni að lágmarksrennsli verið viðhaldið í Þjórsá, en þetta rennsli muni sveiflast og fáránlegt sé að halda öðru fram en að miklar breytingar verði á lífríki. Ekkert komi fram um það hvaða afleiðingar það hafi fyrir líf í sjónum þegar framburður Þjórsár komist ekki lengur til sjávar. Öll þau næringarefni sem fari þar forgörðum geti haft veruleg áhrif á fiskistofna og dýralíf við suðurströndina.

Þá sé virkjanasvæðið sundursprungið, martröð allra jarðfræðinga og upptakasvæði margra stærstu Suðurlandsskjálfta landsins. En fimm blaðsíðna jarðfræðiskýrslan sem fylgdi með umhverfismatinu hafi einfaldlega sagt að rannsaka þyrfti svæðið nánar. Það sé látið duga.

Ingibjörg Elsa sagði í samtali við fréttastofu í dag að hugsunin með umhverfismati væri sú að allar upplýsingar um framkvæmdir ættu að liggja fyrir. Hún sé fyrst og fremst að gagnrýna Skipulagsstofnun og benda á að upplýsingar um jarðfræði hafi verið mjög ófullkomnar þegar skýrslan var gerð. Ef einhverjar aðrar upplýsingar liggi fyrir í dag þá hafi þær ekki komið fyrir sjónir almennings.

Stefán Thors skipulagsstjóri segir að umhverfismatsferlið vegna virkjananna hafi verið opið og lýðræðislegt og það hafi verið fjallað ítarlega um allar kærur sem hafi borist. Umhverfisráðherra hafi staðfest úrskurði stofnunarinnar og ferlinu sé nú lokið.

Hann segir ekki útilokað að gert verði nýtt umhverfismat vegna virkjananna til að mynda ef gerðar hafi verið breytingar á framkvæmdinni. Þá þurfi Landsvirkjun að tilkynna þær svo hægt sé að taka afstöðu til þess hvort þær kollvarpi eldra mati. Engar slíkar breytingar hafi verið tilkynntar enn sem komið er.