Tilraunadýr í einkavæðingu

Búið er að semja um eignaskiptingu Hitaveitu Suðurnesja og mun Geysir Green Energy eignast þriðjung. Minnihlutinn í Reykjanesbæ fordæmir að Suðurnesjamenn séu gerðir að tilraunadýrum í einkavæðingu orkufyrirtækja og telur að bæjarfélagið sé að verða ofurselt Glitni, kjölfestueiganda Geysis Green.

Forkaupsréttarákvæði eigenda Hitaveitu Suðurnesja setti kapphlaupið um fyrirtækið í pattstöðu sem leiddi til þess að menn settust í bakherbergið og sömdu um skiptinu. Uppúr því kemur samkomulag um að Reykjanesbær muni í framtíðinni eiga 35% í Hitaveitunni, Geysir Green Energy 32% og Orkuveita Reykajvíkur sama hlut. Hlutur Orkuveitunnar er háður því að Hafnarfjörður samþykki að selja þangað sinn hlut í fyrirtækinu.  Reykjanesbær á 40%  í Hitaveitunni og selur því Geysi 5% hlut á tvo og hálfan milljarð króna.

Þessi viðskipti leggjast illa í minnihlutann í Reykjanesbæ, ekki síst fyrir þau nánu tengls sem eru á milli bæjarins og Geysis - en að baki Geysi eru Glitnir og Fl Group. Guðbrandur Einarsson, oddvbiti A-listans í Reykjanesbæ telur að bæjarfélagið sé á hálum ís í alltof miklum tengslum við Glitni og FL Group.  Hann nefnir að Glitnir sé áskrifandi að fjármögnun allra framkvæmda í Reykjanesbæ, bankinn sé í samkrulli við bæinn í Keilisháskóla og stöðugt sé verið að færa viðskipti bæjarins til Glitnis og tengdra aðila. Bærinn sé að verða ofurseldur bankanum og nú sé Hitaveita Suðurnesja lögð undir.

Þar sé verið að gera Suðurnesjamenn að tilraunadýrum í einkavæðingu orkufyrirtækja - þar séu skammtímahagsmunir teknir fram yfir langtíma. Hann telur að réttara hefði verið að stefnumörkun um aðkomu einkafyrirtækja að orkufyrirtækjunum yrði rædd og mótuð áður en þetta skref er stigið.