Brimborg mun flytja inn bíla með etanolvélum

Brimborg hyggst hefja innflutning etanolbíla. Egill Jóhannsson, forstjóri Brimborgar, segir að um tilraunarstarfsemi sé að ræða. Búið sé að panta tvo bíla af gerðinni Volvo og Ford sem væntanlegir séu til landsins í ágúst. Hann segir að bílar með etanolvélum seljist vel í Svíþjóð enda séu þeir mjög umhverfisvænir og losi 75% minna af koltvíoxíð en bensínbílar. Egill segir að Olís hafi samþykkt að sjá um innflutning á etanoli og viðræður hafi verið í gangi við stjórnvöld um niðurfellingu á gjöldum af slíku eldsneyti.