Ofbeldi á heimilum mjög sjaldan kært

„Við vitum að réttarkerfið er þannig að fæst málin enda með dómi,“ segir Sigþrúður Guðmundsdóttir hjá Kvennaathvarfinu. Sextán prósent þeirra 300 kvenna sem leituðu til athvarfsins í fyrra vegna heimilisofbeldis kærðu ofbeldið.

„Oft kemur upp í umræðunni að það gagnist lítið að kæra,“ segir Rannveig Þórisdóttir, deildarstjóri upplýsinga- og áætlanadeildar lögreglunnar á höfuðborgarsvæðinu. „Við höfum samt engar upplýsingar sem staðfesta að það geti ekki haft eitthvað upp á sig.“

Kærur vegna heimilisofbeldis eða heimilisófriðar eru tæplega 200 talsins það sem af er ári hjá lögreglunni á höfuðborgarsvæðinu. Tilkynningar vegna slíkra brota hafa hins vegar verið nær átta hundruð, samkvæmt samantekt lögreglu.

Samkvæmt tölunum eru ofbeldismenn á heimilum helst karlmenn á aldrinum 35 til 44 ára. Meðalaldurinn er lægri í flestum öðrum flokkum afbrota, að sögn Rannveigar.

Í fyrra leituðu rúmlega 300 konur til Kvennaathvarfsins vegna ofbeldis á heimili, þar af 99 í dvöl. Yfir hundrað voru að flýja morðhótanir og töldu sig hafa ástæðu til að óttast um líf sitt.

Þriðjungur þeirra sem dvöldu í Kvennaathvarfinu fóru aftur heim í óbreyttar aðstæður. „Sumar konurnar koma oft og með stuttu millibili,“ segir Sigþrúður. „Þetta eru konurnar sem við höfum mesta ástæðu til að ætla að séu beinlínis í hættu heima hjá sér. Þær sem hafa lifað lengi við mjög ljótt ofbeldi stoppa gjarnan stutt og við höfum miklar áhyggjur af þeim.“