Bréf Landsvirkjunnar er ekki ítrekun heldur beiðni um nýja rannsókn

Ingólfur Jóhannsson formaður SUNN, Samtaka um náttúruvernd á Norðurlandi, segir að bréf það sem Landsvirkjun sendi iðnaðarráðuneytinu í vor um Gjástykki sé ekki ítrekun heldur beiðni um nýja rannsókn. Þetta sé augljóst ef rýnt er í gögn málsins, sem samtökin fengu frá iðnaðarráðuneytinu fyrr í sunmar.

"Landsvirkjun kvartar undan því í fjölmiðlum að Landvernd og SUNN hafi ekki kynnt sér mál og telur að umsókn þeirra 8. maí sé eingöngu ítrekun," segir Ingólfur. "Ef rýnt er í gögn málsins, sem samtökin fengu frá iðnaðarráðuneytinu fyrr í sumar, sést að bréf Landsvirkjunar 8. maí er ekki aðeins ítrekun heldur og ný umsókn um rannsóknarboranir, og að minnsta kosti ein af þeim umsögnum sem aflað hafði verið er skilyrt því að hún sé ekki um boranir."

Ingólfur segir að SUNN telji því í hæsta máta óeðlilegt að skoða ekki málið betur en tími var til á tveimur dögum. "Við teljum málið það alvarlegt að Alþingi þurfi að skoða hvort hér er eðlilegt stjórnsýsla á ferðinni," segir hann.

Á bloggsíðu sinni fjallar Ingólfur um málið og segir þar m.a. að það sé athyglisvert að í umsögn Orkustofnunar frá október 2004 er sérstaklega tekið fram að umsögnin sé um leitarrannsóknir, ekki rannsóknarboranir.

Í bréfi Landsvirkjunar 8. maí í vor er svo aftur sérstaklega tekið fram að yfirborðsrannsóknum sé "að mestu lokið á svæðinu og næsta skref í rannsóknum þar [sé] borun rannsóknarhola". Hér er því verið að sækja um annað en áður var sótt um og full ástæða að mínum dómi til að fá nýjar umsagnir, a.m.k. í þeim tilvikum sem hinar eldri voru skilyrtar.