Dönsk, norsk og sænsk lögreglukona á Ljósanótt

Meðal þeirra sem sinntu lögreglustörfum á Ljósnótt í Reykjanesbæ voru þrjár ungar lögreglukonur frá Norðurlöndunum, ein dönsk, ein norsk og ein sænsk. Þær munu vera nemendur í lögregluskólum viðkomandi landa. Koma þeirra hingað er liður í norrænu samstarfi lögregluembætta á Norðurlöndunum.

Sigurður Bergman varðstjóri í lögreglu Reykjanesbæjar segir að alls hafi rúmlega 50 lögreglumenn verið á vakt í nótt og hafi þeir aldrei verið fleiri á einni vakt í bænum. Liðstyrkur kom frá höfuðborgarsvæðinu og var þar meðal annars um að ræða fíkniefnalögreglumenn og fjóra menn úr sérsveit lögreglunnar.

Eins og fram hefur komið í fréttum þótti Ljósanótt heppnast ótrúlega vel fyrir utan umferðartafir í lokin þegar mikill flöskuháls myndaðist á Reykjanesbraut eftir miðnættið vegna umferðarþungans. Starfrækt var athvarf fyrir ölvaða unglinga í bænum en Sigurður segir að þar hafi færri þurft að koma inn en var í fyrra.