Bolvíkingar krefjast aðgerða

Bæjarráð Bolungarvíkur kom saman í dag þar sem kallað var eftir tafarlausum aðgerðum stjórnvalda vegna niðurskurðar aflaheimilda á næsta fiskveiðiári. Bæjarráðið segir ljóst að niðurskurður aflamarks í þorski sé rúmlega 1100 tonn í bænum. Í bókun ráðsins kemur fram að þær mótvægisaðgerðir sem stjórnvöld hafi lagt til séu ekki fallnar til að leysa vanda Bolungarvíkur nema að litlu leyti.

Í bókuninni kemur einnig fram að bæjarstjórn Bolungarvíkur hafi á undanförnum mánuðum kynnt stjórnvöldum „metnaðarfullar og framkvæmanlegar tillögur til að mæta þessum niðurskurði." Þá er bent á að þegar hafi tugir einstaklinga misst vinnuna undanfarna mánuði í bænum og því sé brýnna aðgerða þörf.

Eftirfarandi tillögur eru meðal þeirra hugmynda sem bæjarstjórn Bolungarvíkur hefur lagt fram og kynnt fyrir stjórnvöldum á undanförnum mánuðum:

· Byggja sérhæfða öldrunardeild í Bolungarvík eða Ísafirði strax í haust og í tengslum við uppbygginguna bjóða upp á endurmenntunarnám. Þannig má tryggja fjölda starfsmanna sem nú ganga atvinnulausir starf.

· Tryggja að stofnanir auglýsi alltaf störf án staðsetningar. Hugsanlega mætti beita jákvæðri mismunun - ráða frekar þá sem vilji fara út á land. Setja á laggirnar nýjar stofnanir á svæðinu og flytja aðrar þegar hægt er að koma því við. Tryggja að störf fari vestur eins og lagt er til í Vestfjarðarskýrslunni.

· Eftirlit með óskoðuðum ökutækjum verði flutt til sýslumannsins í Bolungarvík.

· Fella niður veiðigjald þann tíma sem skerðingin nær yfir. Ekki bara af þorski heldur öllum tegundum.

· Fella niður skuldir sveitarfélaganna við Íbúðalánasjóð. Staða sveitarfélaganna er slæm og nauðsynlegar viðhaldsframkvæmdir hafa setið á hakanum.

· Tekjuskipting ríkis og sveitarfélaga - þarf að skera upp strax! Taka 1/3 af fjármagnstekjuskatti og tekjuskatti lögaðila og leggja í jöfnunarsjóð. Nota síðan jöfnunarsjóð sem jöfnunartæki.

Með bættum fjárhag geta sveitarfélögin farið í framkvæmdir sem lengi hafa setið á hakanum. Þannig brúa þau bilið á meðan grunnþjónusta er bætt og sem aftur gerir svæðið samkeppnishæfara.

· Flytja höfuðstöðvar Ratsjárstofnunar til Bolungarvíkur og kanna hvort stjórnstöð geti líka flutt.

· Taka upp flutningsjöfnun strax - í formi niðurgreiddra strandsiglinga eða landflutninga. Sjávarútvegsklasi Vestfjarða lagði til að þetta flutningurinn yrði niðurgreiddur um 100 milljónir á ári í 3 ár. Eftir það væru vegir betri og flutningar á sjó sjálfbærir.

a) Þannig væri möguleiki á að frystigeymslur/vöruhótel myndu rísa og þar með væri von til þess að togarar, sem landa flestir á SV-horninu en sigla frá miðunum hér í kring, myndu aftur landa í vestfirskum höfnum.

b) Ódýrari flutningur bætir starfsskilyrði framleiðslufyrirtækja.

c) Vöruverð á svæðinu lækkar.

· Raforkumálum fjórðungsins verði komið í lag. Svæðið verði hringtengt og línur frá landsnetinu lagðar í jörð. Núverandi ástand fælir stór og smá fyrirtæki frá rekstri á Vestfjörðum.

· Koma upp háhraðatengingu á svæðið - í dag er hvorki hægt að flytja út hugvit né vörur. Flutningsgeta með neti of hæg og flutningur með vörubílum of dýr.

· Byggja upp rannsóknir á Norður Atlantshafi. Þær stofnanir sem gegna þar lykilhlutverki eru: Háskólasetur, Náttúrustofa Vestfjarða, Matís og Hafró. Stefna að því að Háskóli taki til starfa haustið 2008. Benda má á Tromsø í þessu samhengi en byggðastefna Norðmanna sést þar ljóslifandi í verki.

· Lengja strax og endurbæta flugvöllinn á Þingeyri. Þannig mætti efla ferðaþjónustuna og möguleika vestfirskra útgerðarmanna að flytja út fisk.

· Endurskoða hafnarlög. Setning þeirra voru mistök sem koma fæstum höfnum til góða og eru í engu samræmi við raunverulega stöðu hafna á landinu.

· Nýsköpunarþáttur Byggðastofnunar - margfalda möguleika Byggðasjóðs og Impru. Frumkvöðla þarf að virkja og það er staðreynd að neikvæð umræða um Vestfirði og önnur jaðarsvæði á Íslandi hafa dregið úr löngun fjárfesta til að fjármagna á svæðinu.

· Skoða allar þær útfærslur, sem fram hafa komið í tengslum við skattaívilnanir, með opnum huga.