Oprah með stjörnustæla

Oprah Winfrey er sögð hafa farið fram á það að verðandi brúður, sem var búin að panta herbergi á hóteli sem Oprah hafði ætlað vinum sínum, losaði herbergin.

Sjónvarpsstjarnan ætlar að halda fjármögnunarteiti á heimili sínu þann áttunda september næstkomandi fyrir Barack Obama sem hún styður til framboðs í forvali Demókrata til bandarísku forsetakosninganna. Hún hafði hugsað sér að gestir hennar myndu dvelja á San Ysidro Ranch hótelinu nærri heimili hennar í Santa Barbara en þá höfðu verðandi brúðhjón pantað upp öll herbergin fyrir sína gesti.

Samkvæmt Page Six settu útsendarar Opruh sig í samband við brúðina og báðu hana um að skipta um hótel eða losa nokkur herbergi en hún mun ekki hafa fallist á það.

Talsmenn Opruh segja engin slík samtöl hafa farið fram en þó hafa nokkur herbergi á hinu yfirfulla hóteli losnað á undraverðan hátt. Marco Perry, framkvæmdastjóri á San Ysidro Ranch, segir brúðhjónin hafa afpantað herbergin en að það hafi ekki komið að sök þar þar sem næg eftirspurn hafi verið eftir herberjum þessa helgi.