Bíða niðurstaðna hugmyndasamkeppni fyrir Kvosina

Eigendur húsanna við Austurstræti 22 og Lækjargötu 2, sem skemmdust illa í bruna í vor, bíða niðurstöðu í hugmyndasamkeppni borginnar um skipulag í Kvosinni áður en ákvarðanir verða teknar um uppbyggingu á lóðunum. Ekki náðist samkomulag milli eigenda hússins að Austurstræti 22 og borgarinnar um kaup á húsinu og er niðurrif á því þegar hafið.

Bæði húsin skemmdust mjög illa í brunanum í vor og stóðu yfir þreifingar á milli borgaryfirvalda og eigenda hússins að Austurstræti 22, sem áður hýsti skemmtistaðinn Pravda, um kaup borgarinnar á húsinu.

Að sögn Ástráðs Haraldssonar, lögmanns eigenda hússins að Austurstræti 22, bar mikið í milli í viðræðunum og svo fór að það slitnaði upp úr þeim. Ástráður segir að þegar sé byrjað rífa rústir hússins en ekki liggi fyrir hvað verði reist á reitnum. Beðið sé eftir niðurstöðu hugmyndasamkeppni á vegum borgaryfirvalda um skipulag í Kvosinni.

Svæðinu er skipt í tvennt, annars vegar er Lækjartorg og byggðin umhverfis en auk þess stærri reitur sem miðast við Pósthússtræti, Hótel Borg, Skólastræti, Stjórnarráðið og Tryggvagötu.  Að sögn Ástráðs er 1700 fermetra byggingarréttur á lóðinni að Austursstræti 22 en það jafngildir um fimm og hálfri hæð samkvæmt gildandi deiliskipulagi.

Húsnæðið að Lækjargötu 2, sem einnig skemmdist í brunanum í apríl, er í eigu fasteignafélagsins Eikar. Garðar Hannes Friðjónsson, framkvæmdastjóri félagsins, vildi lítið tjá sig um áform á þeirri lóð en sagði að beðið væri eftir niðurstöðu í hugmyndasamkeppni borgaryfirvalda. Hann segir húsið mjög illa farið og erfitt yrði að byggja það upp en ekki ómögulegt.