Skilanefnd lýkur ekki störfum fyrr en á næsta ári

Skilanefnd eignarhaldsfélagsins Samvinnutrygginga mun ekki ljúka störfum á næstu vikum heldur jafnvel ekki fyrr en á næsta ári. Þetta kemur fram í tilkynningu frá formanni skilanefndarinnar, Kristini Hallgrímssyni. Ástæðan er sögð sú að verkefni nefndarinnar hafi verið flóknari en reiknað hafði verið með og hefur skiptafundi sem halda átti með kröfuhöfum á föstudag verið frestað um óákveðinn tíma.

Eins og fram kom í fréttum í byrjun sumars eiga tugir þúsunda hluta af um 50 milljarða króna eignum Samvinnutrygginga gt. Það eignuðust þeir með því að eiga í viðskiptum við félagið á tilteknu tímabili.

Sérstakri skilanefnd var falið að sjá um fjárhagslegt uppgjör Samvinnutrygginga og verða eignir og skuldir félagsins fluttar í sérstakt hlutafélag, Gift ehf., og verða greiðslur til fólks í formi hlutabréfa í Gift.

Rétt á greiðslum eiga þeir einstaklingar sem voru í viðskiptum við Samvinnutryggingar gt á árunum 1987 og 1988 og þeir sem voru með lögboðnar tryggingar húsa hjá Samvinnutryggingum á árunum 1992 og 1993. Eignir þeirra tryggingataka sem hafa látist eða orðið gjaldþrota í gegnum tíðina fara hins vegar í sérstakan sjálfseignarsjóð.

Kröfulýsingarfrestur vegna krafna á hendur Samvinnutryggingum rann út 3. september og hefur skilanefnd síðan fjallað um réttindi aðila og úrskurða um umfang þeirra. Fram kemur í tilkynningunni frá skilanefndinni í dag að 51 þúsund manns eigi rétt á greiðslum frá Samvinnutryggingum en þegar félagið hætti tryggingastarfsemi voru eigendur félagsins tæplega 65 þúsund. Þá segir nefndin að verkefnið hafi reynst tímafrekara en upphaflegar áætlanir stóðu til og viðbúið sé að nefndin ljæúki ekki störfum fyrr en á næsta ári. Ætlunin var hins vegar að ljúka málinu á næstu vikum.

Tekið er fram að ekki sé nauðsynlegt fyrir eigendur í Samvinnutryggingum að lýsa kröfum sínum fyrir félagið því nefndin hafi upplýsingar um þá tryggingartaka sem eiga að njóta eignarréttinda.