Feginn að fá faðernið loksins staðfest

Lúðvík Gizurarson er feginn að faðernismáli hans, til staðfestingar á að hann er sonur Hermanns Jónassonar fyrrverandi forsætisráðherra, er lokið. Dóttir hans á síður von á að hann muni eftirleiðis kenna sig við Hermann.

Árið 2004 fékk Lúðvík Gizurarson lögmaður úr því skorið að hann væri ekki líffræðilegur sonur Gizurar Bergsteinssonar hæstaréttardómara, sem var eiginmaður móður hans Dagmarar Lúðvíksdóttur. Hann hóf þá að berjast fyrir því að fá viðurkennt að hann væri sonur Hermanns Jónassonar fyrrverandi forsætisráðherra og föður Steingríms Hermannssonar einnig fyrrverandi forsætisráðherra.

Málið fór tvívegis fyrir Hæstarétt, fyrst árið 2005 og svo aftur á þessu ári. Í mars úrskurðaði Hæstiréttur að heimilt væri að bera saman fyrirliggjandi lífsýni úr Hermanni og Dagmar og bera þau saman við lífsýni úr Lúðvíki. Niðurstöðurnar voru lagðar fyrir Héraðsdóm sem kvað svo upp úr um það hinn 12. september, að Hermann væri faðir Lúðvíks.

Dóra Lúðvíksdóttir, dóttir Lúðvíks, segir að hann sé mjög feginn að loksins sé komin niðurstaða í málið. Það sé honum mikill léttir. Faðir hennar sé mjög þakklátur öllum þeim sem lögðu honum lið í málinu.

Þegar dómstólar kveða upp úrskurði sem þennan eru þeir sjálfkrafa sendir þjóðskrá, sem breytir um leið fæðingarskýrslu viðkomandi. Hins vegar þyrfti Lúðvík sjálfur að hafa frumkvæði að því að breyta skráningu sinni í þjóðskrá, þannig að þar yrði hann Hermannsson í stað Gizurarson. Dóttir hans á síður von á að hann geri það.

Dóra segir að þegar aldurinn fór að færast yfir föður hennar hafi þessi mál leitað meira á hann. Hann hafi fyrst og fremst viljað koma þessum málum á hreint, þannig að sannleikurinn lægi fyrir.