Mannekla Landspítalans versnar

Mannekluvandi Landspítalans mun aukast á næstu mánuðum segir talsmaður ráðningafyrirtækis, sem spítalinn sagði upp samningi við. Landspítalinn verði því verr í stakk búinn að taka við erlendum hjúkrunarfræðingum.

Landspítalinn sagði nýlega upp samningum við tvö einkarekin þjónustufyrirtæki, Inpro og Alhjúkrun sem hafa útvegað spítalanum tugi hjúkrunarfræðinga til starfa undanfarin ár. Hátt í níutíu hjúkrunarfræðinga vantar á spítalann og hjúkrunarforstjóri Landspítalans sagði í fréttum okkar í gær að meðal annars yrði brugðist við því með því að auglýsa eftir erlendum hjúkrunarfræðingum til starfa.

María Bragadóttir sviðsstjóri hjá Inpro segir uppsagnirnar hafa lítil áhrif á starfsemi fyrirtækisins. Hjúkrunarfræðingar á þeirra vegum snúi að öllum líkindum til annarra starfa sem fyrirtækið útvegi þeim. Hún segir Inpro hafa átt gott samstarf við Landspítalann undanfarin ár.