Skjárinn segir upp 13 manns

Skjárinn, sem rekur meðal annars SkjáEinn, hyggst segja upp 13 fastráðnum starfsmönnum sem starfað hafa við framleiðslu á innlendu efni og hyggst í staðinn semja við framleiðslufyrirtæki um innlenda framleiðslu fyrirtækisins. Þetta kemur fram í tilkynningu frá félaginu.

Þar segir enn fremur að tilgangur breytinganna sé að auka hagkvæmni við dagskrárgerð og tryggja jafnframt að gæði innlendrar framleiðslu Skjásins verði áfram í samræmi við metnað fyrirtækisins um innlenda dagskrárgerð.

„Það er öllum fyrirtækjum nauðsynlegt að leita hagkvæmustu leiða í rekstri hverju sinni og því er áformað að semja við utanaðkomandi framleiðslufyrirtæki um að taka að sér innlendu framleiðsluna," segir Sigríður Margrét Oddsdóttir, framkvæmdastjóri Skásins í tilkynningunni og tekur fram að dagskráin verði áfram öflug.

Til stendur að flytja framleiðsluverkefni Skjásins yfir til framleiðslufyrirtækisins á tímabilinu frá desember í ár til febrúar á næsta ári. Eftir breytingarnar verða starfsmenn Skjásins 38 talsins.