Kópavogsbær opnar eigin vatnsveitu

Kópavogsbær er orðinn sjálfur sér nægur um vatn eftir að vatnsveita bæjarins var opnuð í dag.

Í tilkynningu frá bænum kemur fram að vatnið sé fengið úr vatnsbóli í Vatnsendakrikum í Heiðmörk. Fram að þessu hefur Kópavogsbær keypt vatn af Orkuveitu Reykjavíkur. Auk þess að útvega Kópavogsbúum vatn hefur bærinn gert samning um vatnsöflun fyrir Garðabæ til 40 ára. Í tilefni af þessum tímamótum hafa bæjaryfirvöld í Kópavogi ákveðið að lækka vatnsskatt í bænum um tíu prósent frá og með áramótum.

Um 170 fermetra stöðvarhús hefur verið byggt við borholurnar þaðan sem vatninu er dælt. Frá stöðvarhúsinu er vatnið leitt í lögnum að miðlunargeymi í Vatnsendahverfi í Kópavogi þaðan sem því er miðlað um bæinn. Kostnaðurinn við framkvæmdirnar nemur um 700 milljónum króna.