Bjarni stjórnarformaður REI til áramóta

Orkuveita Reykjavíkur annars vegar og eignarhaldsfélög Bjarna Ármannssonar og Jóns Diðriks Jónssonar hins vegar hafa komist að samkomulagi um að Orkuveitan kaupi aftur það hlutafé í Reykjavik Energy Invest sem þau lögðu inn í félagið í september síðastliðnum. Þetta kemur fram í tilkynningu frá Orkuveitunni.

Þar segir einnig að Bjarni muni sitja sem stjórnarformaður REI til áramóta en þá taki fulltrúi Orkuveitunnar við. Samkomulag Orkuveitunnar annars vegar og Bjarna og Jóns hins vegar verður lagt fyri stjórn Orkuveitu Reykjavíkur í næstu viku.

Í því felst Orkuveitan kaupir hlutabréf eignarhaldsfélaganna í REI á því verði sem þau voru seld á að viðbættum þeim vöxtum sem fjármunirnir hafa borið frá þeim tíma sem þau voru greidd. Hlutafjárframlög eignarhaldsfélaga Bjarna og Jóns Diðriks voru greidd inn á reikning þar sem þau hafa staðið óhreyfð, segir Orkuveitan.

Bjarni hafði keypt hlutafé í Reykjavik Energy Invest fyrir 500 milljónir króna í september en Jón Diðrik Jónsson keypti hlut fyrir 30 milljónir.

Með þessu eignast Okruveitan REI að fullu en áður hafði stjórn hennar og eigendafundur hafnað samruna REI og Geysis Green Energy. Um leið gengu hlutafjárkaup Bjarna Ármannssonar upp á milljarð til viðbótar til baka.

Að sögn Eiríks Hjálmarssonar, upplýsingafulltrúa Orkuveitu Reykjavíkur, hefur ekki verið ákveðið hver tekur við stjórnarformennsku í REI um áramót.