Eiturefni bárust inn í vistarverur skipverja

Slökkvilið höfuðborgarsvæðisins var með töluverðan viðbúnað í gærkvöld eftir að eiturefni í lestum flutningaskips í Sundahöfn bárust inn í vistarverur skipverja.

Samkvæmt upplýsingum frá slökkviliðinu var um að ræða gastegund sem notuð er til þess að drepa skordýr í lestum hveitiflutningaskipa. Vindur mun hafa staðið þannig í höfninni í gær að eiturefnið barst inn í vélarrúm og í vistarverur skipverja og fór viðvörunarbúnaður í gang af þeim sökum.

Slökkvililið sendi reykkafara inn í skipið til þess að kanna aðstæður og voru nokkrir skipverjar fluttir á slysadeild til rannsóknar. Ekki hafa fengist upplýsingar um líðan þeirra.