Brú selur Nokia allt hlutafé í Enpocket

Nokia er að kaupa allt hlutafé í Enpocket, en Brú, dótturfyrirtæki Straums-Burðaráss er einn stærsti hluthafinn þar. Um það bil fimmtíu Íslendingar eiga hlut í félaginu.

Enpocket er leiðandi fyrirtæki í auglýsingum og fleiru í gsm-símum og var stofnað fyrir 6 árum. Brú er einn af fjórum stærstu hluhöfunum, upphaflega í gegnum Landmat, en Landmat og Enpocket sameinuðust árið 2004. Gísli Hjálmtýsson framkvæmdastjóri Brúar og stjórnarmaður í Enpocket sagði að salan væri á lokastigi og að hann ætti von á að málið kláraðist fljótlega. Hann sagðist í samtali við Stöð 2 ekki geta nefnt neinar tölur í þessum viðskiptum, en að um mjög góða fjárfestingu hafi verið að ræða og stóra sölu.

Samkvæmt heimildum fréttastofunnar er heildarverð Enpocket 150 -200 milljónir dollara eða 9,7 - 13 milljarðar króna. Að sögn Gísla eiga líklega um fimmtíu Íslendingar hlut í Enpocket, sem þeir fá væntanlega greiddan á næstunni.