Ísland í hópi menntuðustu OECD þjóða

Ísland er meðal níu landa innan OECD, Efnahags- og framfarastofnunarinnar, þar sem fjórir af hverjum tíu útskrifast úr háskóla.

Í skýrslu OECD kemur fram að mikill munur er á háskólanámi milli landa, þannig að þar sem háskólanám er tiltölulega stutt er mikil ásókn í háskólanám en þar sem það er lengra fara miklu færri í háskóla - jafnvel þó að annar munur milli landanna sé ekki augljós.

Fjórir af hverjum tíu ljúka háskólanámi á Íslandi, Ítalíu, Nýjasjálandi, í Póllandi, Noregi, Hollandi, Ástralíu, Danmörku og Finnlandi. En í til dæmis Austurríki og Þýskalandi klára einungis tveir af hverjum tíu háskólanám.

Í löndum eins og Íslandi þar sem háskólaganga hefur aukist undanfarið er háskólaganga enn að aukast - og sums staðar fara sjö til átta af hverjum tíu í háskóla. Aðildarríki OECD verja stöðugt auknu fé til menntamála, eða fjörtíu prósentum meira nú en fyrir tólf árum.

Efnahags- og framfarastofnunin varar þó við að þrátt fyrir aukin útgjöld, þegar á heildina er litið, séu útgjöld á nemanda víða að lækka. Það kalli á útsjónarsemi við að laða einkafjármagn inn í skólana án þess þó að gera námsmönnum erfiðara fyrir að læra.