Íslendingar sitja lengi á skólabekk

Ástralir og Íslendingar sitja lengst allra á skólabekk og engin þjóð ver jafn miklu af þjóðartekjum í að koma börnunum í gegnum grunn- og framhaldsskóla en Íslendingar.

Þetta kemur fram í nýrri skýrslu OECD. Þeim fjölgar þeim stöðugt sem fara menntaveginn á Íslandi. Árið 2000 var hlutfall fólks á dæmigerðum útskriftaraldri sem í raun brautskráðist úr háskóla rúm þrjátíu prósent manna en árið 2005 voru það 56 prósent. Einungis Ástralir útskrifa fleiri háskólanema.

Íslendingar verja líka talsvert meira fé til að mennta börnin sín en flestar aðrar aðildarþjóðir Efnahags- og framfarastofnunarinnar, eða OECD. Þannig nota Íslendingar 5,4 prósent af vergri landsframleiðslu til að koma börnum í gegnum grunn- og framhaldsskóla en sú þjóð sem næst kemur er Nýjasjáland, með fimm prósent.

Þetta skýrist að einhverju leiti af því að skólaganga hér á landi í grunn- og framhaldsskóla er sú lengsta innan OECD, eða 14 ár.

Hins vegar eru Íslendingar undir meðaltali þegar kemur að háskólunum. Miðað við verga landsframleiðslu verja Íslendingar minna fé til háskólanna en OECD löndin gera að meðaltali, og eru þá tekin með bæði opinber útgjöld og útgjöld einkaaðila.

Varðandi þá sem klára framhaldsskólann eru góðar fréttir og slæmar. Árið 2000 útskrifuðust 67 prósent unglinga úr framhaldsskóla en það hlutfall er komið upp í 80 prósent. Slæmu fréttirnar eru þær að mikill munur er á kynjunum. Miklu fleiri stúlkur útskrifast úr framhaldsskóla, eða 92 prósent þeirra, en einungis 68 prósent drengja.